TOШКЕНТ, 18 август — Sputnik. Испаниянинг икки шаҳрида террорчилик ҳаракатлари содир этилди, деб хабар берди РИА Новости. Аввалига Барселонада фургон одамлар устига бостириб борди, сўнгра Камбрильс шаҳрида номаълум кишилар йўловчиларга ҳужум уюштиришди. Терактлар оқибатида жами 13 киши ҳалок бўлди, юздан ортиқ киши жароҳатланди.
Пайшанбадан жумага ўтар кечаси каталон полициячилари Камбрильсда террорчилик ҳужуми уюштиришга тайёрланаётган террорчиларни йўқ қилди.
Испан матбуотининг хабар қилишича, террорчилар автомобилда йўловчилар устига бостириб боришган ва бир неча кишини уриб кетишган. Уларнинг машинаси ағдарилиб кетган, жиноятчилар қочишга уринган чоғида йўқ қилинган.
Каталония полициясининг маълум қилишича, махсус операция чоғида тўрт террорчи ўлдирилган, яна бири қўлга олинган, лекин олган жароҳатлари сабабли вафот этган.
Камбрильсдаги теракт оқибатида жами етти киши жароҳатланган, улардан икки нафари оғир аҳволда.
Илгарироқ Барселонада фургон пиёдалар устига бостириб борганди. Гувоҳларнинг айтишича, ҳайдовчи иложи борича кўпроқ одамни босиб кетишга уринган. Автомобиль киоскка урилиб тўхтаганидан сўнг ҳайдовчи қочиб кетган.
Теракт 13 кишининг ҳаётига зомин бўлди, юздан ортиқ киши жароҳатланди. Хабарларга қараганда, ҳужум оқибатида 18 мамлакат фуқароси жабр кўрган.
Каталония ҳуқуқ тартибот идораларининг маълум қилишича, теракт билан алоқадорликда гумонланиб Шимолий африкалик икки киши ҳибсга олинган.
