ТОШКЕНТ, 21 окт — Sputnik. Тошкентда Жанубий Корея фуқаросига нисбатан зўрлик ишлатиб тунаш ҳолати содир бўлди.
Пойтахт ИИББнинг маълум қилишича, 17 октябрь куни тахминан соат 23:40ларда, Зуҳриддин Ҳасанов Жанубий Корея фуқароси Мин Чунг Ённинг мол-мулкини талон-торож қилиш мақсадида унга нисбатан босқинчилик ҳаракатини содир этган.
Ҳасанов зўрлик ишлатиб, хориж фуқаросининг икки дона "Samsung" русумли уяли телефони, фуқаролик паспорти ҳамда 2 миллион сўм миқдоридаги пулларини тортиб олиб, жиноят содир этилган жойдан яширинган.
Мазкур ҳолат юзасидан Миробод тумани ИИБ ҳузуридаги Тергов бўлими томонидан Ўзбекистон Жиноят кодексининг 164-моддаси 1-қисми (босқинчилик, яъни ўзганинг мулкини талон-торож қилиш мақсадида ҳужум қилиб, ҳаёт ва соғлиқ учун хавфли бўлган зўрлик ишлатиш) аломатлари билан жиноят иши қўзғатилган.
Ҳозирда дастлабки тергов ҳаракатлари давом эттирилиб, Ҳасановнинг бошқа жиноятларга алоқадорлиги текширилмоқда.
