ТОШКЕНТ, 16 ноя – Sputnik. Ўзбекистон Футбол федерацияси президенти Умид Аҳмаджонов Жанубий Корея Футбол ассоциацияси президенти Чун Мун Гунинг таклифига кўра Сеул шаҳрида Жанубий Корея футболи мутассаддилари билан учрашди. Бу ҳақда ЎФФ матбуот хизмати хабар бермоқда.
Сеулда бўлиб ўтган учрашув чоғида ЎФФ ва Жанубий Корея ФА ўртасидаги ҳамкорликни кучайтириш масалалари муҳокама қилинди.
Учрашув давомида Умид Аҳмаджонов ва Чун Мун Гу ЎФФ ва Жанубий Корея ФАнинг ҳамкорлик тўғрисидаги меморандумини имзоладилар.
Ушбу меморандум икки федерациянинг турли тоифадаги терма жамоаларига ўқув-машғулот йиғинларини ўтказиш ва мусобақаларда иштирок этиш, тегишли мутахассис ва экспертларига ўқув курслари, семинар ва конференцияларда иштирок этиш имконини беради.
Бундан ташқари, томонлар икки мамлакатнинг турли ёшдаги терма жамоалари ўртасида ўртоқлик учрашувларини ташкил қилиш бўйича ҳам ҳамжиҳатликда ишлашга келишиб олдилар.
Сеулдаги учрашувдан сўнг Умид Аҳмаджонов Япония пойтахти Токио шаҳрига учиб кетди. Токиода 17 ноябрь куни Япония Футбол Ассоциацияси президенти билан учрашув ўтказиш режалаштирилган.
