Узбекская валюта - сум

МБ айрим банклар ман этилган комиссион ҳақларни ундирганини аниқлади

466
МБ агар фуқароларда бундай тўловларни банклар томонидан ундирилганлик ҳолатлари мавжуд бўлса, қайтариш талаби билан хизмат кўрсатувчи банкка мурожаат этишни маслаҳат берди

ТОШКЕНТ, 29 июн - Sputnik. Марказий банк жорий йил биринчи кварталда 20 та тижорат банкининг 212 та филиалида мижозлар билан тузилган шартномалар, шунингдек банкка тўланган комиссион тўловларни ўрганди ва ўрганиш натижаларига кўра, банклар томонидан мижозлардан қонун ҳужжатлари билан таъқиқланган комиссион ҳақлар ундириш амалиёти аниқланди.

Шунга кўра, барча тижорат банкларига улар томонидан кўрсатилаётган хизматларнинг шартларини тўлиқ хатловдан (инвентаризациядан) ўтказиш ва мижозларга асоссиз равишда ундирилган комиссион тўловларни қайтариш юзасидан кўрсатма берилган.

Қонун ҳужжатларига мувофиқ тижорат банклари мижозлардан қуйидагилар учун тўлов ундириш ҳуқуқига эга эмас:

а) мижознинг банк ҳисобварағига келиб тушган маблағларни кирим қилиш (кредит айланмаси учун), шунингдек кредит бюроси ва гаров реестри хизматлари учун тўловлар;

б) 2018 йил 24 мартдан бошлаб: 

кредит буюртмаларини кўриб чиқиш (шу жумладан, кредитни ташкил этиш учун тўланадиган комиссиялар), ссуда ҳисобварақларига хизмат кўрсатиш (шу жумладан, кредит буйича ҳисобланадиган фоизлардан ташқари, ҳар ойда тўланадиган комиссион тўловлар, кредитга хизмат кўрсатиш учун тўланадиган комиссиялар), кредитлар ажратиш учун (берилаётган кредит суммасидан тўланадиган бир марталик комиссия) амалга ошириладиган тўловлар;

- жисмоний шахслар ва кичик тадбиркорлик субъектлари томонидан кредитлар (микроқарзлар)ни муддатидан олдин қайтарилганлиги учун тўланадиган неустойкалар.

МБ шу муносабат билан истеъмолчиларда юқорида қайд этилган тўловларни банклар томонидан ундирилганлик ҳолатлари мавжуд бўлса, уни қайтариш талаби билан хизмат кўрсатувчи банкка мурожаат этишни маслаҳат берган. Шунингдек, истеъмолчи ўз шартномасидаги юқорида қайд этилган тўлов турларини бекор қилишни хизмат кўрсатувчи банкдан талаб қилиш ҳуқуқига эгалигини эслатган.

"Банклар томонидан ноқонуний ундирилган комиссияларни қайтариш ҳамда шартномадаги қонун ҳужжатларига зид бўлган шартларни бекор қилиш борасида муаммоларга дуч келсангиз, у ҳолда Сиз Марказий банкнинг Банк хизматлари истеъмолчиларининг ҳуқуқларини ҳимоя қилиш хизматига ёзма равишда ёки (71) 200-00-44 рақамли кўп каналли ягона "Ишонч телефони" орқали мурожаат этишингиз мумкин", - дейилади МБ хабарида.

466
Чарвакское водохранилище в Узбекистане

Ўзбекистонда сув танқислиги юзага келиши мумкин

2
(Янгиланган 18:45 03.06.2020)
Бугунги кунда Андижон, Каркидон, Оҳангарон, Талимаржон, Арнасой ва Чорвоқ сув омборларида захиралар аввалги йилларга нисбатан 20-30 %га кам.

ТОШКЕНТ, 3 июн - Sputnik. Ўзбекистонда сув танқислиги вужудга келиши мумкин - ҳукумат бунинг олдини олишга ҳаракат қилмоқда. 

Вазирлар Маҳкамаси "2020 йил ёзги суғориш мавсумида экин майдонларини сув билан ишончли таъминлаш ва сув танқислигининг олдини олиш бўйича шошилинч чора-тадбирлар тўғрисида" қарорини қабул қилди.

Ўзгидромет маълумотларига кўра, керакли меъёрларга нисбатан сув ресурсларининг етарли даражада таъминланмаслиги кутилмоқда. Хусусан, Қашқадарё, Оҳангарон ва Фарғона водийсининг шимолий қисмидаги сув ҳавзаларида - 70 фоиз, Сурхондарё ва Чирчиқда - 75 фоиз, Қорадарё - 80 фоиз, Вахш, Зарафшон ва Норинда - 85 фоиз, Фарғона водийсининг жанубида - 90 фоиз.

Бугунги кунда Андижон, Каркидон, Оҳангарон, Талимаржон, Арнасой ва Чорвоқ сув омборларида захиралар аввалги йилларга нисбатан 20-30 фоизга кам.

Сув танқислиги  олдини олиш ва ресурслардан самарали фойдаланиш учун Ўзбекистон ҳукумати суғориш учун сув етказиб берилишини тўлиқ назорат қиладиган ишчи гуруҳни тузди. Ҳар бир канал ва суғориш тармоғи бўйича ўн кун ичида сув олиш лимитларини тасдиқлаш топширилди.

Июн ойида барча суғориш тизимлари, насос қурилмалари, шу жумладан кўчма қурилмалар ва вертикал суғоришга мўлжалланган қудуқлар таъмирланади. Сувни тежайдиган самарали суғориш технологияларини жорий қилиш давом эттирилиши режалаштирилмоқда.

2020 йил учинчи ва тўртинчи чоракларида кўчма насос ускуналарини сотиб олишга режалаштирилган 31 миллиард сўм миқдорида бюджет ажратмалари иккинчи чоракка кўчирилади.

2019 йил октябр ойида президент Шавкат Мирзиёев сув ресурсларини бошқариш тизимини такомиллаштиришни назарда тутувчи кенг кўламли ҳужжатни имзолади. Сув хўжалиги бошқаруви соҳасида бозор тамойиллари ва механизмларини, давлат-хусусий шерикликни жорий этиш, шунингдек, ушбу йўналишда илм-фанни ривожлантириш чоралари кўрилди.

Сув тежайдиган технологиялар ёрдамида суғориладиган ерларнинг улуши умумий суғориладиган ерларнинг камида ўн фоизига етказилади. Сув ҳужалигининг 300 иншооти ва гидроузелларида сувни бошқариш ва ҳисобга олиш тизимини автоматлаштириш кўзда тутилган.

Сув ҳўжалиги вазирлиги қошида сув ресурсларини бошқариш соҳасидаги лойиҳаларни амалга ошириш бўйича Агентлик ташкил этилди.

2
Добыча нефти в США

“Лукойл” “Ўзбекнефтегаз” янги меморандум имзолади

31
Қўшма корхона янги инвестицион блокларнинг нефт ва газ истиқболларини баҳолаш учун геологик ва геофизик маълумотларни ўрганади.

ТОШКЕНТ, 3 июн - Sputnik. “Лукойл” “Ўзбекнефтегаз” билан Ўзбекистонда геологик қидирув ва нефт ва газ қазиб олиш соҳасида қўшма ҳамкорлик тўғрисида янги меморандум имзолади, деб ёзади РИА Новости "Лукойл Узбекистан оперейтинг компани" матбуот хизматига таяниб.

“Тошкентда "Лукойл" ОАЖ ва "Ўзбекнефтегаз" АЖ ўртасида янги ўзаро англашув меморандуми имзоланди ... Меморандум геологик қидирув ва тижорий қазиб олиш мақсадида қўшма корхона ташкил этишни кўзда тутади”, - дейилади хабарда.

Таъкидланишича, қўшма корхона янги инвестицион блокларининг нефт ва газ истиқболларини баҳолаш учун геологик ва геофизик маълумотларни ўрганади.

Март ойида "Ўзбекнефтегаз" "Лукойл" компанияси билан Ўзбекистонда разведка қилиш бўйича қўшма корхона тузишни, шунингдек, Россия компаниясининг ишлаб чиқаришни рақамлаштириш бўйича тажрибасини ўрганишни режалаштираётгани ҳақида хабар берилган эди.

"Лукойл" раҳбари Вагит Алекперов 2018 йил кузида компания ва "Ўзбекнефтегаз" қидирув бурғулаш истиқболларини ўрганишини айтиб ўтган эди. Ўзбекистон томонининг маълумотларига кўра, 2020 йил июнига келиб "Лукойл" Марказий Қизилқум нефт ва газ ҳудудида жойлашган учта блок - Акбугет, Бешбулоқ ва Тошқудуқ бўйича қарор қабул қилиши мумкин.

"Лукойл" компанияси Ўзбекистонда 15 йилдан бери ишлаб келмоқда. Унинг мамлакатдаги барча лойиҳаларга киритган жами сармояси 10 миллиард долларни ташкил этади. Компания "Қандим-Хаузак-Шоди" ва "Ҳисор" лойиҳалари бўйича маҳсулот тақсимоти тўғрисидаги битимлар асосида ишлайди. Ўтган йили "Лукойл" компанияси томонидан бошқарилаётган лойиҳалардан табиий газнинг жами қазиб олиниши 60 миллиард кубометрга етди.

31