ТОШКЕНТ, 23 май – Sputnik. Ўзбекистондан 2,5 асрлик маданий бойликни яширинча олиб чиқиш режаси фош этилди. Бу ҳақда Давлат божхона қўмитаси хабар қилди.
Қайд этилишича, Бухоро вилояти божхона бошқармаси “Бухоро аэропорти” чегара божхона пости ходимлари томонидан “Бухоро-Москва” йўналишидаги авиарейс билан учиб кетаётган фуқаро кўздан кечирилган.
Фуқаро ўзи билан 1750 йилда зарб этилган қадимий тангани олиб кетишга урингани аниқланган.
Ҳозирда ашёвий далил сифатида вақтинча сақловга олинган қадимий танга Бухоро давлат бадиий меъморчилик музей қўриқхонаси тасарруфига топширилди.
