ТОШКЕНТ, 11 май — Sputnik. Ўзбекистон Ташқи ишлар вазирлиги расмий сайтида Қирғизистонга келаётган Ўзбекистон фуқароларига эслатма эълон қилинди.
Хабарда таъкидланишича, Қирғизистон Республикаси Ҳукуматининг "Чет эл фуқароларининг ва фуқаролиги йўқ шахсларнинг Қирғизистон ҳудудида рўйхатдан ўтиши" тўғрисидаги қарорига мувофиқ, чет элликлар, шу жумладан Ўзбекистон фуқаролари ҳам Қирғизистон давлат чегарасини кесиб ўтган кундан бошлаб, беш иш куни мобайнида рўйхатдан ўтишлари шарт.
"Қирғизистон ҳудудида ўрнатилган тартибларга риоя қилмаган шахсларга нисбатан Қирғизистон Республикаси қонунчилигида белгиланган 10 000 сом миқдорида жарима жазоси қўлланилади",- деб таъкидланади ТИВ баёнотида.
Батафсил маълумотни Ўзбекистоннинг Қирғизистондаги элчихонаси расмий веб-саҳифасидан (www.uzbekistan.kg) ёки элчихонанинг консуллик бўлимидаги +996 (312) 986-296 телефон рақами орқали мурожаат қилиб олиш мумкин.
