ТОШКЕНТ, 16 окт — Sputnik. Ўзбекистонда хорижий инвестор республикага 3 миллион АҚШ долларидан кам бўлмаган қийматда маблағ киритиши шарти билан 10 йиллик муддатга вақтинча яшаш учун рухсатнома берилиш имконияти пайдо бўлди. Шу билан бирга, салоҳиятли инвесторларга қўшимча имтиёзлар ва унинг оила аъзоларига Ўзбекистон фуқаролари билан тенг равишда таълим олиш учун преференциялар кафолатланади.
Россиялик иқтисодчи фикрига кўра, маблағларни жалб қилишнинг бу усули бутун дунёда кенг тарқалган, аммо якуний натижа аниқ шарт-шароитларга, пул тикмоқчи бўлган чет эл фуқароси қўлга киритадиган афзалликларга бориб тақалади.
Бундай тажриба кўплаб тараққий топган мамлакатлар – АҚШ, Швейцария кабилар томонидан қўлланиб келинган. Хорватияда ҳам, масалан, курортлар қурилишида бу турдаги рухсатнома бериш дастури бор эди, дейди иқтисодчи.
"Асосий савол, бундай тажрибани қўлламоқчи бўлган давлат янги инвесторларга қандай манфаатли афзалликларни тақдим эта олади? Инвесторларни қандай енгилликлар, солиқ имтиёзлари кутиб қолади? Рухсатномага белгиланган нархга келадиган бўлсак, унинг у қадар баланд ва паст ҳам эмаслигини қайд этиш керак. Умумий кўрсаткичлардан келиб чиқилса, фикримча, ҳаражатлар кутиладиган салоҳиятли даромадлардан ҳозирча ошиб ўтяпти. Шунинг учун ҳам бу механизмни жуда кўп бизнесмен қўллайди, деб ўйламайман”, - дея таъкидлади Шабанов.
Айни вақтда, эксперт ушбу дастур келгусида ривож топиши ва ҳозирги шарт-шароитлар бу хорижий ҳамкорларни комплекс жалб қилиш йўлида илк қадам бўлиши мумкинлигини инкор этмади.
