Ўзбекистонда "MUSOFIR" рақамли платформаси яратилади - Бош прокуратура академияси

158
(Янгиланган 12:20 30.07.2020)
Бундан ташқари, "Миграция ҳуқуқи" фанини алоҳида ҳуқуқ соҳаси сифатида ўқитиш билан боғлиқ дарслик тайёрланади.

ТОШКЕНТ, 30 июл - Sputnik. Бош прокуратура Академияси қатор миллий ҳамкорлар билан "Аҳоли миграциясида рақамли визалар платформасини ишлаб чиқиш" номли инновацион лойиҳа таклифини ишлаб чиқди, деб хабар бермоқда Sputnik Ўзбекистон мухбири.

Бу ҳақда 30 июль - Одам савдосига қарши курашиш умумжаҳон кунига бағишлаб, "COVID-19 пандемияси шароитида Одам савдосига қарши курашиш" мавзусида онлайн халқаро давра суҳбати давомида маълум қилинди.

 

Ўзбекистон учун ноқонуний меҳнат миграцияси одам савдоси жиноятининг келтириб чиқарувчи асосий омиллардан бири ҳисобланади. Шунинг учун бу борада илмий тадқиқотларни амалга ошириш муҳим аҳамият касб этиши таъкидланди.

Бош прокуратура Академияси қатор миллий ҳамкорлар билан "Аҳоли миграциясида рақамли визалар платформасини ишлаб чиқиш" номли инновацион лойиҳа таклифини ишлаб чиқди.

Унинг доирасида хорижда ишга жойлашиш имкониятлари, чет эл давлатлари миграцион қонунчилиги, депортация қилинганлик бўйича тақиқлар ва хорижга чиқиш юзасидан қўйилган чекловлар ҳолати тўғрисидаги маълумотларни мужассам этган ягона "MUSOFIR" номли рақамли платформа яратиш кўзда тутилган.

Бундан ташқари, меҳнат мигрантлари ва оила аъзоларининг ҳуқуқларини ҳимоя қилишга қаратилган илғор халқаро ва хориж стандартлари ва тажрибалари ўрганилади ва "Миграция ҳуқуқи" фанини алоҳида ҳуқуқ соҳаси сифатида ўқитиш билан боғлиқ дарслик тайёрланади.

Шунингдек, Россия Федерацияси прокуратура университети билан ҳамкорликда "Ўзбекистон ва Россияда одам савдосига қарши курашиш" мавзусига оид қўшма таҳлилий маълумотдан иборат қўлланма тайёрлаш режалаштирилмоқда.

158

Россияга пандемия вақтида кириб борган ўзбекистонликлар сони айтилди

857
Россияга 2020 йилнинг биринчи ярмида кириб борган чет элликлар орасида украиналиклар ва Марказий Осиё фуқаролари етакчилик қилмоқда

ТОШКЕНТ, 5 авг — Sputnik. Россия Федерациясига биринчи ярим йилликда чет эллик фуқаролар оқими 60%га қисқарди. Бу ҳақда Федерал хавфсизлик хизмати чегара хизмати статистикасида келтирилган.

Хусусан, пандемия вақтида Россияга боришни истаган фуқаролар орасида Марказий Осиё давлатлари вакиллари кўпчиликни ташкил қилади. ФХХ маълумотларига кўра, олти ой давомида РФга Қозоғистондан 885 минг, Ўзбекистондан 620 минг, Тожикистондан 373 минг ва Қирғизистондан 212,3 минг фуқаролар келган.

Россияга пандемия вақтида ташриф буюрган чет элликлар орасида Украина фуқаролари кўпчиликни ташкил этади - 1,7 миллион киши.

Шунингдек, чет эллик туристлар сони 86%га қисқарган.

Январ ойидан март ойига қадар Россияга 5,5 миллион чет элликлар кириб келган бўлсалар, чегаралар ёпилгач келганлар сони 509 минг нафарни ташкил этган.

857

Россия иқтисодиёти миграциясиз инқироздан чиқа олмайди - тожикистонлик эксперт

225
Раҳмон Улмасов Россиянинг баъзи амалдорларининг пандемия пайтида Россияда мигрантлар орасида жиноятчилик даражаси ошгани ҳақидаги гапларига муносабат билдирди.

ТОШКЕНТ, 5 авг - Sputnik. Коронавирус пандемияси даврида Россиядаги меҳнат мигрантлари кўпроқ жиноят содир этишни бошламади, дейди миграция бўйича мутахассис, Россия-Тожикистон (Славян) университети профессори Раҳмон Улмасов РИА Новости билан суҳбатда ва бунга далиллар келтирди.

"Нимагадир баъзи мансабдорлар пандемия пайтида ва ундан кейин меҳнат мигрантлари орасида жиноятчилик кўпаймоқда деган фикрни доим гапиришмоқда", - деди Улмасов. Кейин Россия ИИВнинг маълумотларини келтирди. Унга кўра, Россияда коронавирус пандемияси пайтида мигрантлар орасида жиноятлар сони сезиларли камайган.

Шунингдек, профессор ички ишлар вазири ўринбосари Владимир Ефимовнинг май ойининг охирида айтган сўзларини келтирди, унга кўра пандемия пайтида мигрантлар орасида криминоген вазият ёмонлашмаган.

"Москвада криминоген вазият ёмонлашгани кузатилмаяпти. Ефимовнинг сўзларига кўра, мигрантлар орасидаги жиноятлар сони 1,2 фоизга, чет элликлар томонидан содир этилган қотилликлар 2 фоизга, босқинчиликлар 8,1 фоизга, талончиликлар 9,4 фоизга, ўғирликлар 5,5 фоизга камайди", - дейди Улмасов. Унинг сўзларига кўра, қайд этилган жиноятларнинг умумий сони 2019 йил майига нисбатан 5,6 фоизга камайди.

Мутахассис мигрантларнинг аксарияти Россияга яхши ният билан - ўз оилаларини таъминлаш учун пул ишлашга келганлигини таъкидлашни зарур деб ҳисоблади. Бироқ, унинг таъкидлашича, улар орасида "маълумотсиз ва тажрибасиз мигрантларни радикал тузилмаларга жалб қилиш ва ноқонуний хатти-ҳаракатлар уюштириш истагидаги" ва "профессионал провокатор ва технологлар" борлигини истисно қилиб бўлмайди.

Раҳмон Улмасовнинг сўзларига кўра, марказий осиёликлар 20 йил ичида анча ўзгарган. Россияда яшашга одатланиб, ўз ватанларига кетиш ўрнига, улар пул топишнинг янги имкониятларини излай бошлаганлар.

"Мигрантларнинг болалари мутлақо бошқача авлоддир, эҳтиёжлари ва режалари мутлақо ўзгача. Улар ҳатто инқироз пайтида ҳам жиноятга қўл урмайдилар, чунки улар ўз касби ёрдамида пул ишлашни билишади", - дейди эксперт. Унинг маълумотларига кўра, 2020 йил июль ойида Марказий Осиё республикаларига пул ўтказмалари ҳажми 25 фоизга ошган.

Шу билан бирга, профессор пандемия пайтида ва ундан кейин дунёнинг барча мамлакатларида миграция соҳасида кўплаб ноқонуний мигрантларнинг пайдо бўлишига олиб келиши мумкинлиги ҳақида огоҳлантиради, чунки ёлланган чет эллик ишчилар учун иш берувчилар жавобгарликни ўз зиммаларига олмайдилар. Бундан ташқари, унинг фикрига кўра, бу мигрантлар иш ҳақи конвертларда берила бошлашига олиб келади.

Тожикистонлик эксперт мигрантларни Россия иқтисодиётидаги инқирозни енгиб ўтиш учун қимматли манба сифатида кўради, чунки ҳозирда аёллар фойдасига демографик устунлик бунга тўсқинлик қилмоқда. Масалан, унинг сўзларига кўра, шу йил бошида Россияда 68,1 миллион эркак ва 78,6 миллион аёл яшаган - фарқ 10,5 миллион. Унинг таъкидлашича, бу устунлик 2036 йилгача давом этади. Россия иқтисодиёти миграциясиз инқироздан чиқа олмайди, дея хулоса қилди эксперт.

225
Государственный департамент США

АҚШ Давлат департаменти "Россия пропагандаси" асослари ҳақида ҳисобот эълон қилди

0
Давлат департаменти баёнотига кўра, "Россия дезинформацияси"га уюшган саъй-ҳаракатлар қарши қўйилган бўлиб, АҚШ уларни тўғридан-тўғри қўллаб-қувватлашни мақсад қилган

ТОШКЕНТ, 6 авг - Sputnik. Давлат департаменти чоршанба куни "Россия дезинформацияси ва пропагандаси экотизими асослари" ҳақида ҳисоботни эълон қилди, унда у ўзининг "рус тарғиботи" ҳақидаги концепциясини тизимлаштирган бўлиб, хусусан, "пропаганда" тушунчасига - давлат томонидан молиялаштириладиган Россия ОАВлари киритилган.

"Россиядаги хабарларни бузиб кўрсатиш ва тарғибот экотизими - бу расмий, қўл остидаги, алоҳида белгилари бўлмаган коммуникация каналлари ва платформалари йиғиндиси бўлиб, Россия улардан сохта воқеаларни яратиш ва улар таъсирини кучайтириш учун фойдаланади. Ушбу экотизим беш асосий устундан иборат: расмий ҳукумат коммуникациялари, давлат томонидан молиялаштириладиган глобал эшиттиришлар, қўл остида мавжуд ресурслар культивацияси, ижтимоий тармоқлардан қурол сифатида фойдаланиш ва кибермакондаги фаолият орқали сохта маълумотлар тарқатиш. Кремль ушбу тактика ва платформалар культивацияси учун бевосита жавобгар - бу унинг маълумотлардан қурол сифатида фойдаланиш бўйича дастурининг бир қисмидир", дейилади ҳисоботда.

Дезинформацияларга мисол сифатида жумладан, Sputnik, РИА Новости, RT, Биринчи канал, Россия 24 ва бошқа медиа-ресурслар сарлавҳалари келтирилган. Хусусан, РИА Новостининг "(Буюк Британия бош вазири) Жонсонга ўпканинг сунъий вентиляцияси ўтказилиши" ҳақидаги мақола дезинформация дея аталган. Бу дезинформация эканлигини тасдиқловчи ҳеч қандай далил келтирилмаган.

Давлат департаменти баёнотига кўра, "Россия дезинформацияси"га уюшган саъй-ҳаракатлар қарши қўйилган бўлиб, АҚШ уларни тўғридан-тўғри қўллаб-қувватлашни мақсад қилган.

"Россия культивация қилишда давом этаётган маълумотларни бузиб кўрсатиш ва тарғибот экотизими ўз рақибларидан холи эмас. Унга ушбу тактикага тоқат қилишдан бош тортаётган ҳукуматлар, фуқаролик жамияти ташкилотлари, олимлар, матбуот, хусусий сектор ва фуқароларнинг дезинформацияга қарши бўлган ривожланаётган ҳамжамияти қарши чиқмоқда. Давлат департаменти ушбу ҳисоботни қўшма саъй-ҳаракатларга қўшаётган ҳисса сифатида тақдим этмоқда", - дейилади ҳужжатда.

АҚШ Давлат департаменти "Россия томонидан бўлаётган хабарларни сохталаштириш ва пропагандага қарши туриш учун" учун 2021 йил учун давлат бюджетидан 138 миллион доллар сўраган. Кремль ва РФ ТИВ бундан олдин ҳам Россия номига дезинформация бўйича қўйилаётган айбловларни кўплаб маротаба рад этган.

АҚШда чет эл бўйича хабарлар давлат агентлиги - "Америка Овози" ва Озодлик/Озод Европа радиоси бош тузилмаси мавжуд бўлиб, уларни РФ Адлия вазирлиги бошқа ОАВлар билан бир қаторда хорижий агентлар рўйхатига киритган. 1994 йилдан буён BBG деб номланган ташкилот 2018 йилда АҚШнинг глобал ОАВлари бўйича агентлиги (USAGM) этиб қайта номланган. Унинг доирасида фақатгина интернетда узатиладиган теле-дастурлар ишлаб чиқарилади. Агентлик тўлалигича АҚШ бюджетидан молиялаштирилади, 2017 йилда унинг харажатлари 748 миллион долларни ташкил этди.

0