ТОШКЕНТ, 5 июл — Sputnik. Жорий йилнинг 12 июл куни Тошкентда БМТ Бош Ассамблеясининг "Марказий Осиё минтақасида тинчлик, барқарорлик ва барқарор ривожланишни таъминлаш учун минтақавий ва халқаро ҳамкорликни мустаҳкамлаш" тўғрисидаги резолюциясининг муҳокамасига бағишланган давра суҳбати бўлиб ўтади, деб хабар қилди Ўзбекистон ТИВ.
Тадбирнинг асосий мақсади — БМТнинг Марказий Осиё бўйича резолюцияси моҳиятини ва аҳамиятини, шунингдек, Марказий Осиёда тинчлик, барқарорлик ва барқарор ривожланишни таъминлашда минтақавий ва халқаро ҳамкорликни мустаҳкамлаш истиқболларини муҳокама қилишдан иборат.
Давра суҳбатида Ўзбекистон Республикаси Олий Мажлиси Сенати ва Қонунчилик палатаси, Ташқи ишлар вазирлиги, Ташқи савдо вазирлиги, "Ўзбекистон темир йўллари" давлат акциядорлик компанияси, Фанлар академияси, Халқаро муносабатлар ахборот-таҳлил маркази, халқаро ташкилотлар ваколатхоналари вакиллари, хорижий мамлакатларнинг дипломатик ваколатхоналари раҳбарлари, шунингдек, Ўзбекистонда аккредитациядан ўтган хорижий журналистлар иштирок этади.