ТОШКЕНТ, 11 дек - Sputnik, Дилшода Раҳматова. Россия ва Ўзбекистон ўртасидаги стратегик шериклик ва иттифоқдошлик муносабатлари айниқса сўнгги икки йилда жуда муҳим, аниқ маъно касб этмоқда, деди Россиянинг Ўзбекистондаги элчиси Владимир Тюрденев бугун, сешанба куни, Тошкентда ўтказилган икки давлат алоқаларидаги гуманитар ўлчовларга бағишланган халқаро илмий анжуманда.
Тадбирни очиб берган дипломат Россия-Ўзбекистон алоқалари ҳақида гапириладиган бўлса, муносабатлар йўлга қўйилган сана ёдга олинишини айтди.
"Бу алоқалар 26 йил муқаддам йўлга қўйилгани, бу вақт мобайнида ўзаро алоқалар стратегик шериклик ва иттифоқдошлик характерга кўтарилганини эътироф этамиз. Ва сўнгги икки йилда ушбу стратегик шериклик ва иттифоқдошлик муносабатлари жуда муҳим, аниқ маъно касб этаётганига урғу берамиз", - деб қайд этди дипломат.
Россия элчиси шу ўринда Ўзбекистоннинг Биринчи президенти Ислом Каримов томонидан айтилган бир жумлани ёдга олди.
"Ислом Абдуғаниевич ўзининг бир гапида Россия ва Ўзбекистоннинг ўзаро алоқаларига тавсиф берар экан, халқларимизни боғлаб турган минглаб, ўн минглаб ришталар ҳақида айтган эди. Шу ўринда тарихчи, жамоат арбоби Юлий Степанович Флыгиннинг сўзларини келтиришни ўринли деб биламан, бизнинг муносабатларимиз 26 йил олдин бошланмаган, улар анча олдин бошланган. Негаки халқларимиз бирга бўлишган ва улар ҳақиқатда минглаб ришталар билан боғланганлар", - деди Тюрденев.
Элчи Россия президенти Владимир Путиннинг яқинда Ўзбекистонга амалга оширган расмий ташрифи давомида гуманитар-маданий алоқаларга катта эътибор қаратилганини қўшимча қилди.
"Биз бугунги кунда маданий-гуманитар ҳамкорлик бу - майин куч, деб гапиришга одатланганмиз. Мен эса бу ҳамкорликни халқаларимизни боғлаб турган ўша минглаб-юз минглаб ришталарнинг энг муҳим йўналишлардан бири деб биламан", - деди элчи ва бугунги тадбир ушбу ўзаро муносабатлар тарихидаги ҳақиқани қайта яратишда муҳим роль ўйнашини таъкидлади.
