ТОШКЕНТ, 28 авг — Sputnik. Яқин истиқболда Тошкент шаҳар ИИББ йўл ҳаракати хавфсизлиги бошқармаси инспекторларининг барча ҳаракатлари уларга қарашли автомобилларга ўрнатилган махсус видеорегистраторларга ёзилади, деб хабар қилмоқда Sputnik Ўзбекистон мухбири.
Таъкидлаш жозики, йўл полициячилари ходимларининг регистраторлар билан таъминланиш амалиёти Европада анча кенг тарғиб қилиниб, ушбу амалиёт ўзини оқлаган. Мисол учун, Буюк Британияда мобил регистраторлар жорий қилингач инспекторлар устидан шикоятлар бир йилда 93%га камайган. Айни вақтда йўл инспекторларининг портатив видеорегистраторлар билан таъминланиши лойиҳалари Россия, Беларус ва МДҲга аъзо қатор давлатларда ҳаётга татбиқ этилмоқда.
Автомобилга ўрнатилган замонавий тизим, шунингдек, ўғирланган автомобилларни излаш билан ҳам шуғулланади. У ёнидан ўтиб кетаётган барча транспортларни қайд қилиш хусусиятига эга. Айнан мана шу автомобил туфайли бир ой давомида 129 миллион сўмлик жарима пулини ундиришга муваффақ бўлинган.
ЙҲХБ га қарашли бошқа автомобиллар ҳам шу каби тизим билан жиҳозланиши учун тайёргарлик кўрилмоқда.
Шунингдек, Ўзбекистонда видеорегистраторлардан фойдаланишни кенгайтириш йўналишида ҳам ишлар амалга оширилмоқда. Бу борада пойтахт милицияси Хитой тажрибасини ўрганаётгани таъкидланмоқда.
Йўл инспекторлари автомобиллари яқин келажакда видеорегистраторлар билан таъминланади ва бу билан машина ташқарисида ва ички қисмида содир бўлаётган воқеаларни ёзиб бориш имконияти туғилади. Яъни йўл инспекторлари ҳаракатлари тўлиқ видеорегистраторларга қайд этиб борилади.
