Новый дизайн автомобилей ГУВД Ташкента

Йўл ҳаракати қоидаларини бузган икки нафар ИИБ ходими жаримага тортилди

616
Йўл ҳаракати қоидаларни бузган ИИБ ходимларига нисбатан маъмурий ҳуқуқбузарлик ҳақидаги баённома расмийлаштирилди.

ТОШКЕНТ, 2 ноя — Sputnik. Тошкент ИИББ ижтимоий тармоқларда тарқалган видео лавҳалар юзасидан изоҳ берди.

Хабарда айтилишича, 31 октябрь куни Нодир Темиров исмли фойдаланувчи “Водители Ташкента (DRIVERS.UZ)” гуруҳида хабар қолдирди: видеорегистраторда қайд қилинишича, шу куни эрталаб хизмат давлат рақамига эга “Нексия-3” русумли автомобиль Чоштепа кўчасидан ҳаракатланиб, оқимдаги транспорт воситаларига халал берган.  

“Ушбу ҳаракат билан Йўл ҳаракати қоидаларининг 53-банди, яъни “Ҳайдовчи ҳаракатланишни бошлаш, йўналишни ўзгартириш (қайта тизилиш, бурилиш, қайрилиб олиш, қувиб ўтиш ва айланиб ўтиш) ва тўхташдан олдин бажарилаётган манёвр хавфсиз эканлигига ва бошқа ҳаракат қатнашчиларига халақит бермаслигига ишонч ҳосил қилиши керак” қоидаси бузилган. Ушбу маълумот бир нечта блогерлар ва ОАВлар томонидан ҳам эълон қилинди” – дейилган хабарда. 

“Нексия-3” русумли автомобиль (давлат рақами 01 067 VSC) Шайхонтохур тумани ички ишлар бўлимига бириктирилган. Бундай ҳаракатланишга сабаб (мисол учун, зарур чақирув, ҳуқуқбузарлик ва ҳоказо) бўлмаганлиги аниқланди.

Автомобилни бошқарган ходимга нисбатан кейинги кун соат 07:50 да Маъмурий жавобгарлик тўғрисидаги кодекснинг 128-5-моддасига  мувофиқ маъмурий ҳуқуқбузарлик ҳақидаги баённома расмийлаштирилган. Унга кўра, транспорт воситалари ҳайдовчиларининг авария ҳолати юзага келишига сабаб бўлган, яъни йўл ҳаракатининг бошқа қатнашчиларини тезликни, ҳаракат йўналишини кескин ўзгартиришга ёки ўз хавфсизлигини ёхуд бошқа фуқароларнинг хавфсизлигини таъминлаш учун ўзга чораларни кўришга мажбур қилувчи ҳуқуқбузарликни содир этиши, – энг кам иш ҳақининг ўн баравари миқдорида жарима солишга сабаб бўлади.

Ҳайдовчи билан йўлларда хатога йўл қўйиш мумкин эмаслиги ҳақида профилактик суҳбат ўтказилди.

Пойтахт Учтепа тумани махсус инспекцияси ижтимоий тармоқлар фойдаланувчилари хабарини қайд этишди. Яъни: 29-октябрь куни соат 18:08 да Lolita Shah исмли фойдаланувчи юқоридаги гуруҳда видеомаълумот қолдирган эди, унда “Нексия-3” автомобили (давлат рақами 01 158 VSC) Фарход ва Лутфий кўчалари кесишмасидаги светофорнинг тақиқловчи сигналини менсимасдан ҳаракатланган.

Ушбу автомобиль Учтепа тумани ИИО ФМБга бириктирлган бўлиб, уни бошқарган ходимга нисбатан  Маъмурий жавобгарлик тўғрисидаги кодекснинг 128-4-моддаси иккинчи қисми бўйича маъмурий баённома тузилди. Унга кўра, Транспорт воситалари ҳайдовчиларининг светофорнинг тақиқловчи сигналига ёки йўл ҳаракатини тартибга солувчининг тақиқловчи ишорасига бўйсунмасдан ўтиши, – энг кам иш ҳақининг икки баравари миқдорида жарима солишга сабаб бўлади. Ҳайдовчи билан профилактик суҳбат ўтказилди.

616