ТОШКЕНТ, 25 мар — Sputnik. Ўзбекистонда COVID-19 билан касалланган тўрт нафар беморнинг аҳволи оғир деб баҳоланмоқда. Бу ҳақда Вазирлар маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков маълум қилди.
Нурмат Отабековнинг сўзларига кўра, 55 нафар беморлардан 13 нафарида ўпка яллиғланиши, пневмония аломатлари кузатилмоқда.
“Тўрт нафар беморнинг аҳволи оғир деб баҳоланмоқда. Улар тегишли интевсив-терапия муолажаларини олмоқда”, - деди у.
Санитария-эпидемиология назорати давлат инспекцияси бошлиғининг қўшимча қилишича, ҳозирда 20 мингдан ортиқ аҳоли қатъий карантин остида.
Эслатиб ўтамиз, аввалроқ Санитария-эпидимиологик осойишталик агентлиги директори Баҳром Алматов коронавирус аниқланган беш беморда касаллик белгилари йўқолгани ва уларга тез орада жавоб берилишини маълум қилган эди.
