ТОШКЕНТ, 17 янв – Sputnik. Миллий банк туризм соҳасида қурилаётган ва таъмирланаётган объектларни қўшимча молиялаш мақсадида кредит линияси очди, деб хабар қилмоқда Туризмни ривожлантириш қўмитаси.
“Кредит маблағлари меҳмонхоналар ва туташ йўл, муҳандислик ва коммуникация инфратузилмалари объектлари учун импорт ускуналар ва технологияларни харид қилиш учун ишлатилиши мумкин”, - дейилган хабарда.
Кредит умумий муддати 15 йил, шундан имтиёзли давр — 5 йилни ташкил қилади. Мақсадли кредит ҳажми лойиҳа умумий қийматининг 50 фоизидан ошмаслиги лозим, дейилган хабарда.
Шунингдек, бир қарз олувчига бериладиган кредит миқдори битта инвестиция лойиҳаси учун 10 млн. АҚШ долларидан ошмаслиги лозим.
Ушбу кредитни олиш борасида хўжалик юритувчи субъектлар Ўзбекистон Миллий банкига мурожаат қилишлари мумкин.
