ТОШКЕНТ, 19 май — Sputnik. Россия чегараси яқинида душманларнинг бу қадар уюшиши 1941 йил, нацистлар Германиясининг ҳужуми давридан буён кузатилмаган эди, деб таъкидлади америкалик сиёсатчи, Россия бўйича эксперт, профессор Стивен Коэн Жон Батчелор кўрсатувида. РИА Новости хабари асосида.
Россия президенти Владимир Путиннинг матбуот-котиби Дмитрий Песков, Москва НАТОнинг бу ҳаракатларига қарши жавоб чоралари кўраётганини бир неча бор таъкидлаган.
"Менинг Вашингтонга саволим бор, нима учун НАТОни айнан Вашингтон назорат қилади, — наҳотки, биз, Россия билан реал уруш сари қадам қўяётганимизни англамаяпмиз, ёки мақсадимиз Россияни ҳарбий ҳаракатларга мажбур қилишми", — деб мулоҳаза қилади профессор Коэн.
Агар, биринчи вариант тўғри бўлса, яъни, АҚШ ўз ҳаракатлари қандай оқибатларга олиб келишини чиндан англамаётган бўлса, у ҳолда, имкон қадар тезроқ "уйғонмоқ" керак, дейди сиёсатчи.
"Агар иккинчи вариант тўғри бўлса, яъни АҚШ Россияга қарши уруш очишга "қарши бўлмаса", унда Америка "ақлдан озгани аниқ", деб қўшимча қилди у. Профессорнинг фикрига кўра, бундай турдаги ҳарбий можаролар охир-оқибат томонларнинг бири ядро қуролини қўллаши билан якун топиши шубҳасиз.
"Бир ойдан бери НАТО қандай қилиб Россия чегараси яқинида — қуруқликда, денгизда ва самода ўз ҳарбий кучларини тобора ошираётганини кузатяпман", — деди Коэн. "Иккинчи жаҳон уруши давридан буён Москва атрофида бу қадар кўп душман кучлар тўпланмаган эди. Россияликлар Германия ҳужумини эсдан чиқармаган, шу боис, НАТОнинг ҳатти-ҳаракатларига жиддий қарашади", — деб таъкидлади у.
"Лўнда қилиб айтганда, Путин нима қилди? У агрессия билдиряпти, ёки агрессияни кучайтиряпти, деган жавобнинг бизга кераги йўқ. Бу жавоб билан АҚШнинг Россияга қарши уруш очишга тайёрлигини оқлаб бўлмайди", — деб таъкидлади Коэн.
Профессор шунингдек, Россия шунчаки НАТО ҳаракатларига ўз муносабатини билдиряпти ва у бунга тўлиқ ҳақли, деди. "Владимир Путин мужмалланиб ўтирмай, лўнда қилиб: НАТО Россия учун хавф туғдирмоқда, деди.
Альянснинг "Россия ўз ҳарбийларини НАТОга тобора яқин олиб келаяпти" деган арз-доди эса, сурбетликдан бошқа нарса эмас, деб ҳисоблайди профессор.
Россия ва НАТО ўртасидаги айни вақтдаги инқироз 1962 йилдаги Кариб ороли инқирозини эслатмоқда. Аммо ҳозирги аҳвол анча хавфлироқ. Жумладан, 1962 йилда совет ракеталари "Америкадан 90 мил нарида" жойлаштирилган бўлса, НАТО ўз ракеталарини Россиядан икки қадам нарида тўғрилаб қўйган.
