Жанубий Кореянинг собиқ президенти Каримов ҳақида: мен яқин дўстимни йўқотдим

ТОШКЕНТ, 8 сен — Sputnik. Жанубий Кореянинг собиқ раҳбари Ўзбекистоннинг Биринчи Президенти Ислом Каримов вафоти муносабати билан ўз ҳамдардлигини изҳор қилди, деб хабар қилади "Жаҳон" АА.

Хабарда ёзилишича, Ли Мён Бак элчихонанинг ҳамдардлик китобида қуйидаги таъзияномани қолдирган: "Менинг самимий ҳамдардлигимни қабул этгайсизлар. Мен ўз дўстимни ҳеч қачон унутмайман. Яратган унинг оиласи ва Ўзбекистон халқини ўзининг ҳифзу ҳимоясига олишидан умидворман".

Маросим якунида Ли Мён Бак Президент Ислом Каримов билан яқин дўстлар бўлишгани ва тез-тез учрашиб туришганини айтди.

"Бу мен учун сира кутилмаган воқеа бўлди, — деди Жанубий Кореянинг собиқ етакчиси. — Мен яқин дўстимни йўқотдим. Мен дафн маросимида шахсан қатнаша олмадим. Ўзбекистон етакчиси оиласига менинг алоҳида ҳамдардлигим ва қайгъудошлигимни етказишларингизни сўрайман".

Ички ишлар ва давлат бошқаруви вазири Хонг Юн Сик эса тарихан қисқа давр мобайнида Ислом Каримов Ўзбекистон тараққиётида катта ишларни амалга оширишга эришганини қайд этган. Корея Республикаси ҳукуматининг аъзоси миллий етакчи томонидан мўлжалланган режалар бундан кейин ҳам муваффақият билан ҳаётга тадбиқ этилишига умид билдирган.

Ташқи ишлар вазирининг биринчи ўринбосари Лим Сонг Нам Ўзбекистоннинг биринчи Президентининг бевақт вафоти муносабати билан Ўзбекистон ҳукумати ва халқига ўзининг самимий ҳамдардлигини изҳор этиш асносида қуйидагиларни қайд этган: "Ислом Каримовнинг Ўзбекистон ва Жанубий Корея ўртасидаги кўп қиррали муносабатлар ривожи ва уларни стратегик шериклик даражасига олиб чиқилишидаги ҳиссасини баҳолаш қийин. Ишончим комилки, бизларнинг ўзаро алоқаларимиз бундан кейин ҳам кенгайиб бораверади".