ТОШКЕНТ, 8 июл – Sputnik. Якшанба куни кечқурун Грузиянинг йирик телеканалларидан бири ҳисобланган “Рустави-2” телеканали бошловчиси Георгий Габуния Россия президенти Владимир Путин ва унинг марҳум ота-онасини қаттиқ ҳақорат қилганидан сўнг телеканал атрофида фавқулодда норозилик намойиши бошланиб кетди, деб хабар қилмоқда Sputnik Грузия.
Телеканал атрофида юзлаб одамлар жамланиб телеканал бошловчисини ҳайдашни ва умумсан “Рустави-2”ни ёпишни талаб қила бошлашди. Намойишчиларни энг қаттиқ ғазабга солган нарса – бу телебошловчининг Путиннинг марҳум ота-онасини ҳақорат қилиши бўлди. Маълумки, Грузияда ҳам Ўзбекистонда бўлгани каби ота-онани жуда ҳурмат қилишади.
Телеканал ходимларининг хавфсизлигини таъминлаш мақсадида унинг атрофи полиция билан ўраб олинди. Айни дамда Грузия раҳбарияти ва ТИВ ушбу воқеага ўз муносабатини билдирди.
“Биз Рустави-2 телеканали бошловчисининг сўзларин қаттиқ қоралаймиз. Ушбу воқеанинг сўз эркинлигига ҳеч қандай алоқаси йўқ, ушбу сўзлар фақат провокация бўлиб, фақатгина Россия-Грузия муносабатларини мураккаблаштиришга қаратилган”, - дейилган Грузия ташқи ишлар вазирлигининг расмий баёнотида.
Грузия президенти Саломе Зурабишвили фейсбукда ҳам бошловчининг ушбу сўзларида ҳеч қандай ватанпарварлик ҳисси йўқлигини, у ўзининг ушбу сўзлари билан Грузия манфаатларига катта зарар етказганини ёзиб қолдирган.
“Рустави-2” телеканали Грузиянинг собиқ президенти Саакашвили етакчилк қилган “Ягона миллий ҳаракат” партиясига тегишли бўлган. Айни дамда партия барча йўналишларда инқирозга учраган бўлсада, унинг айрим вакиллари ҳалиям провокациялар уюштиришга уринишларини тўхтатмаган.
