Алишер Султонов Ўзбекистон Париж битимини қай тарзда бажаришини айтди

291
Энергетика вазири Ўзбекистон газ-транспорт тизимида бэски типдаги двигателлар ишлатилиб келинаётгани боис, катта йўқотишлар бўлаётгани, атмосферага йирик миқдорда ангидрид гази ташланмалари рўй бераётганини айтди. Шу боис, уларни алмаштиришга қарор қилинган.

ТОШКЕНТ, 21 сен - Sputnik, Дилшода Раҳматова. Ўзбекистон карбонат ангидрит гази ташланмалари бўйича бугунги кунда катта ютуқлар билан мақтана олмайди. Бироқ мамлакат айни вақтда Европа тараққиёт ва тикланиш банки (ЕТТБ), Бутунжаҳон банки ва Осиё тараққиёт банки(ОТБ) билан Париж битими нормаларига амал қилиш бўйича жуда катта ишларни олиб бормоқда, деди бугун хорижий журналистлар билан учрашувда Ўзбекистон энергетика вазири Алишер Султонов.

"Яқинда Венада бўлганимда, Париж битими нормаларига амал қилиш масаласида бир нечта учрашувларни ўтказдим. Биз бугун бу борада улкан ишларни амалга оширяпмиз. Хусусан, бугун Европа тикланиш ва тараққиёт банки билан музокара олиб бордик. ЕТТБ Ўзбекистон газ-транспорт тизимининг бир қисмини модернизация қилишга тайёрлигини билдирди. Сал олдин Осиё тараққиёт банки Ўзбекистон газ-транспорт тизимини модернизация қилиш ишларини молиялаштиришини эълон қилганди. Бундан ташқари, келгуси ҳафтада япониялик ҳамкасбларимиз билан газ-транспорт тизимини комплекс модернизация қилиш масалаларини муҳокама қилишни режалаштирганмиз", - деди Ўзбекистон энергетика вазири. 

Султоновнинг таъкидлашича, Ўзбекистондаги газ-транспорт тизимида эски типдаги двигателлар ишлатилиб келинаётгани боис, катта йўқотишлар, атмосферага йирик миқдорда ангидрид гази ташланмалари рўй бермоқда. Шу учун, барча компрессорларни замонавий типдагиларига алмаштиришга қарор қилинган.

Вазирнинг айтишича, бу ишларни амалга ошириш бўйича дастур ижросига 5-10 йил вақт ва катта миқдорда маблағ кетади.

Аммо бугун молиявий институтлар Ўзбекистонга бошқача назар билан қарай бошлаганлар. "Шу бугун ЕТТБ билан бу каби лойиҳаларни учун молиялаштириш учун масблағларни суверен кафолат бермасдан тақдим этиш масаласини кўриб чиқдик. ЕТТБ ҳеч қачон шу пайтгача бизга бундай таклифларни айтмаган", - деди у. 

Эслатиб ўтамиз, иқлим бўйича Париж битимини Ўзбекистон 2017 йилнинг 19-апрел куни БМТнинг Нью-Йоркдаги қароргоҳида имзолаган. Париж битими иқлим ўзгариши, 2020-йилдан атмосферада буғхона газлари миқдорини камайтириш юзасидан чора-тадбирларни тартибга солиш бўйича БМТнинг дастлабки конвенцияси доирасида қабул қилинган ҳужжат ҳисобланади.

Битимдан кўзланган мақсад ҳароратнинг глобал ўсишини Цельсий шкаласи бўйича ўртача 2°C даражадан паст ҳолатда ушлаб туриш ва ҳарорат ўсиши Цельсий шкаласи бўйича 1,5 даражада чекланиши учун саъй-ҳаракатларни ишга солиш билан изоҳланади.

291

Москвадаги Ғалаба парадига аввало МДҲ етакчилари таклиф этилади - Песков

164
(Янгиланган 11:25 05.06.2020)
Москвадаги Ғалаба паради 24 июнь куни бўлиб ўтади. Россия пойтахтига келиши билан тадбир иштирокчилари ва меҳмонлар тиббий кўрикдан ўтказилиб, COVID-19га тест топширишади.

ТОШКЕНТ, 5 июн — Sputnik. Москвадаги Ғалаба парадига таклифномалар юборишда аввалгидек Мустақил Давлатлар Ҳамдўстлиги мамлакатлари етакчиларига урғу берилади, дея хабар қилди РФ президенти матбуот-котиби Дмитрий Песков.

"Мен сизларга яна бир бор ҳозирда урғу МДҲ давлатлари етакчиларини таклиф этишга қаратилаётганини эслатиб ўтаман", - деди у.

Песков журналистлар томонидан берилган "РФ президентининг БМТ Хавфсизлик Кенгаши "бешлиги"даги ҳамкасбларига Москвада ўтказиладиган Ғалаба парадига таклифнома юборилганми?", деган саволга шу тарзда жавоб қайтарди.

Эслатиб ўтамиз, коронавирус пандемияси туфайли Россияда бу йил Ғалабанинг 75 йиллигига бағишланган ва анъанавий тарзда 9 май куни ўтказилиши режалаштирилган барча оммавий тадбирлар бекор қилинди.

Аммо 26 май куни РФ президенти Владимир Путин тадбирга тайёргарликни бошлашга чақирган ва Ғалаба паради ўтказиладиган санани 24 июнь этиб белгилаган эди.

Аввалроқ таъкидланганидек, параднинг барча хорижий иштирокчилари ва парад меҳмонлари Москвага келиши билан тиббий кўрикдан ўтказилади ва коронавирусга тест топширишади.

Шунингдек, Россияга боришдан аввал чет эл делегациялари икки ҳафталик карантинга амал қилишлари ва Москвага келишлари билан COVID-19 йўқлиги ҳақида ҳужжатларни тақдим этишлари лозим бўлади.

164
Въезд в поселок Сардоба, пострадавший от наводнения

Сардобада сув остида қолган қабристонларнинг манзилли харитаси тузилди

176
(Янгиланган 11:25 05.06.2020)
Олдинроқ талафот кўрган жойларда жами 7та қабристон ва 3та масжидга зарар етган бўлиб, уларнинг ҳудудини сувдан тозалаш, санитария ва ободонлаштириш ишлари олиб борилаётгани ҳақида хабар берилган эди.

ТОШКЕНТ, 5 июн - Sputnik. "Сардоба" тўғони ўпирилиши натижасида сув остида қолган қабристонлар аниқланиб, уларнинг манзилли харитаси тузилди. Бу ҳақда Ер ресурслари, геодезия, картография ва давлат кадастри давлат қўмитаси ахборот хизмати раҳбари Неъматжон Атамуродов АОКА ҳузуридаги штабида ўтказилган брифингда маълум қилди.

Эслатиб ўтамиз, олдинроқ талафот кўрган жойларда жами 7та қабристон ва 3та масжидга зарар етган бўлиб, уларнинг ҳудудини сувдан тозалаш, санитария ва ободонлаштириш ишлари олиб борилаётгани ҳақида хабар берилган эди.

2 июнь куни Фавқулодда вазиятлар вазирлиги "Сардоба" сув тошқини талофатларини бартараф этиш бўйича амалга оширилаётган ишлар бўйича ҳисоботида 6 та қабристондаги 311 та қабр қайтa тиклангани ҳақида маълум қилган эди.

Эслатиб ўтамиз, Сардоба сув омбори тўғонининг бир қисми ўпирилиб, ёндош туманлардаги маҳаллалар ва далаларни сув босган эди. Натижада Сардоба, Мирзаобод ва Оқолтин туманларида 2 минг 570 та уй-ҳовли, 76 та кўп қаватли уй яроқсиз ҳолга келган эди. Шунингдек, 1 минг 781 ҳовли, 52 та кўп қаватли турар жой қисман зарарланган. Ҳозирда тошқин оқибатларини бартараф этишга қаратилган ишлар жадаллик билан олиб борилмоқда. Жумладан, президент Мирзиёев томонидан Сардобада қуриладиган янги уйлар пойдеворига тамал тоши қўйилган эди.

176
Мавзу:
“Сардоба” тўғони ёрилиши
Виза в паспорте

Авиакомпаниялар Ўзбекистонга келувчи йўловчилар ҳақида ДХХга олдиндан хабар қилади

60
(Янгиланган 11:06 05.06.2020)
Ушбу йилнинг 1 июлидан бошлаб брча хорижий авиакомпаниялар йўловчилар паспорт маълумотларини ДХХ Чегара қўшинларига олдиндан хабар қилиш тартиби ўрнатилади.

ТОШКЕНТ, 5 июн - Sputnik. Ўзбекистонга учаётган хорижий мамлакатлар ҳаво кемалари ўз йўловчилари бўйича дастлабки маълумотни тақдим этиш тартиби белгиланди деб хабар қилмоқда Ўзбекистон Туризмни ривожлантириш қўмитаси.

Янги тартибга кўра, 1 июлдан бошлаб хорижий авиакомпаниялар йўловчилар тўғрисидаги дастлабки маълумотларни Ўзбекистон ДХХнинг Чегара қўшинларига тақдим этиши шарт. 

"2020 йилнинг 1 июль кунидан бошлаб Ўзбекистон Республикасига парвозларни амалга ошираётган хорижий мамлакатлар ҳаво кемаларининг барча эксплуатантлари томонидан йўловчилар тўғрисидаги дастлабки маълумотлар ИКАОнинг стандарт форматида Давлат хавфсизлик хизматининг Чегара қўшинларига тақдим этилади", - дейилган хабарда.

Ушбу тартибни жорий этиш Ўзбекистон Вазирлар Маҳкамасининг 2020 йил 19 майдаги “Ўзбекистон Республикаси Давлат хавфсизлик хизматининг Чегара қўшинлари бўлинмаларига хорижий мамлакатларнинг ҳаво кемалари эксплуатантлари томонидан йўловчилар бўйича дастлабки маълумот тақдим этилиши тартиби тўғрисидаги низомни тасдиқлаш ҳақида”ги 293-сонли Қарорида белгиланган.

Хабарда айтилишига кўра, мазкур тартибнинг жорий этилиши хорижий туристларнинг мамлакатга келишлари, бўлишлари ва республика ҳудудидан чиқиб кетишларида қўшимча қулайликлар яратишга хизмат қилади.

 

60