“Халқаро армия ўйинлари-2019” жорий йилнинг 3 августидан 17 августига қадар ўтказилади. “АрМИ-2019” танловлари 10 та давлат ҳудудида ташкил этилди: Озарбайжон, Арманистон, Беларусь, Эрон, Ҳиндистон, Қозоғистон, Хитой, Мўғилистон, Россия ва Ўзбекистон.
“Фориш” тоғ полигонида V Халқаро армия ўйинлари доираси Ўзбекистонда илк маротаба ўтказилган “Ҳарбий-тиббий эстафета” танлови ўтказилди. Унда Ўзбекистон ҳарбийлари биринчи ўринни қўлга киритди.
Ўзбекистон танкчилари Москва вилоятида жойлашган Алабино дала-ўқув майдонида Халқаро армия ўйинларининг “Танк биатлони” йўналиши бўйича II дивизионнинг финал баҳсида Уганда, Куба ва Вьетнам жамоалари устидан устун келиб, ғолибликни қўлга киритишди.
Ҳиндистоннинг Ражастхон штати Жайсалмер шаҳри яқинидаги дала-ўқув майдонида бўлиб ўтган “Қўшин разведкаси аълочилари – 2019” мусобақасида ўзбекистонлик разведкачилар шарафли иккинчи ўринни эгаллашди. Ўзбекистонлик муҳандис-сапёрлар Халқаро армия ўйинларининг “Хавфсиз маршрут” йўналишида учинчи ўринни эгаллади.
Москва вилоятининг Дмитров шаҳрида Халқаро армия ўйинлари доирасида ўтказилган “Содиқ дўст” мусобақаси ўзбекистонлик кинологлар иккинчи ўринга лойиқ деб топилди. Унда Ўзбекистон номидан қатнашган шартнома бўйича ҳарбий хизматчи, оддий аскар Содиқ Дилмуродовнинг “Клифт” лақабли хизмат ити билан рекорд ўрнатди.
