Болалар боғчаси архив сурат

Мирзиёев болалар боғчаси масалаларини ҳал этишни режалаштирган

839
Бугунги кунда Ўзбекистонда 5048 та мактабгача таълим муассасаси мавжуд бўлиб, шундан 4916 таси давлат, 132 таси нодавлат мактабгача таълим муассасаси ҳисобланади

ТОШКЕНТ, 14 ноя — Sputnik. Тадбиркорлар ва ишбилармонлар ҳаракати – Ўзбекистон Либерал-демократик партиясидан Президентликка номзод Шавкат Мирзиёевнинг сайловолди дастурида давлатга қарашли 1 миллион 109 минг ўринли 2 минг 200 та болалар боғчасини қуриш, капитал таъмирлаш ва жиҳозлаш масалаларини ҳал этиш режалаштирилмоқда, деб хабар бермоқда ЎзЛиДеП матбуот хизмати.

Бугунги кунда Ўзбекистонда 5048 та мактабгача таълим муассасаси мавжуд бўлиб, шундан 4916 таси давлат, 132 таси нодавлат мактабгача таълим муассасаси ҳисобланади. Мазкур таълим муассасаларида 668,5 минг нафар бола тарбияланмоқда. Бу 2-7 ёшдаги жами болаларнинг 26,5 фоизини ташкил қилади.

Хусусийлаштирилган боғчаларга 5715 нафар бола қатнамоқда. Ушбу таълим масканларида  55 мингдан ортиқ педагоглар фаолият олиб боришмоқда.

Ўзбекистонда охирги йилларда ҳар йили 1 миллионга яқин янги иш ўринлари яратилмоқда. Янги ишга жойлашганларнинг аксариятини эса аёллар ташкил этмоқда. Бу эса ўз-ўзидан уларнинг фарзандларини боғчаларга жойлаштириш заруратини туғдирмоқда.

"Шунинг учун ҳам Тадбиркорлар ва ишбилармонлар ҳаракати – Ўзбекистон Либерал-демократик партиясидан Ўзбекистон Республикаси Президентлигига номзод Шавкат Мирзиёевнинг  сайловолди дастурида ижтимоий сиёсатнинг муҳим йўналиши бўлган мактабгача таълим-тарбия тизимининг моддий-техника базасини мустаҳкамлаш, ижтимоий соҳани ривожлантириш борасидаги "Ислоҳот – ислоҳот учун эмас, аввало инсон учун" тамойилини изчиллик билан ҳаётга татбиқ этиш устувор вазифа деб белгиланган", — дейилади хабарда.

Хусусан, давлатга қарашли 1 миллион 109 минг ўринли 2 минг 200 та болалар боғчасини қуриш, капитал таъмирлаш ва жиҳозлаш масалаларини ҳал этиш режалаштирилмоқда.

Ўзбекистон Президентлигига сайловлар 4 декабр куни бўлиб ўтади.

839
Мавзу:
Ўзбекистонда президент сайлови (124)
Плачущий ребенок

Фарғонада беш фарзандига алиментдан қарздор бўлиб қолган ота қочиб кетишни афзал кўрди

28
(Янгиланган 18:13 06.08.2020)
Мурожаатларга кўра, аксарият ҳолларда, алиментдан қарздор вилоятдаги оталар Тошкент шаҳрида ва хорижда (Росссия Федерацияда) яширинишлари аниқланган.

ТОШКЕНТ, 6 авг - Sputnik. Фарғона вилоятида беш нафар фарзандига алимент тўлашни истамаган эркак оиласидан яширинишни афзал кўрди. Қидирувдаги "ношуд ота" шу кунларда қўлга тушди, деб хабар қилди Sputnik Ўзбекистон мухбирига Ўзбекистон Республикаси Бош прокуратура ҳузуридаги Мажбурий ижро бюроси ахборот-хизмати раҳбари.

Таъкидланишича, 2016 йилдан буён алимент тўлаш мажбурияти юклатилган ота - Т.Ғаниев - Фарғона вилоятидан бўлган. 2019 йил октябрь ойидан бошлаб давлат ижрочиси уни яшаш манзилидан топа олмай қолган. Маҳалла-кўй, қўни-қўшнилари ҳам у ҳақда маълумот бера олмаган.

Шундан сўнг, давлат ижрочиси томонидан қарздорга нисбатан қидирув эълон қилиш тўғрисида қарор қабул қилинган.

Қарийб бир йил мобайнида дараги бўлмаган ашаддий алиментчи жорий йил июль ойи охирида Ўзбекистон туманидаги боғдорчилик фермер хўжаликларида ёлланма ишчи сифатида ишлаб юрган жойида Бюронинг Ўзбекистон туман бўлими қидирув гуруҳи ва туман ички ишлар бўлими ходимлари томонидан ушланган.

Маъмурий баённома расмийлаштирилаётган вақтда эркак алиментдан қарзи - 11 млн 879 минг сўм пулларни танишлари орқали бўлимга олиб келтириб, 5 нафар фарзандларини ёлғиз катта қилаётган ундирувчи О.Ғаниевага нақд санаб топширган.

Шунингдек, ўтказилган профилактика тадбирлари натижасида у келгусида алимент тўловларини ойма-ой тўлаб бориши, яширинмаслиги ва яшаш жойидан кетиб қолмаслиги ҳақида ваъда берган.

МИБ ахборот хизмати маълумотига кўра, жорий йил 1 июль куни ҳолатига кўра, идорага келиб тушган 992 мингдан зиёд ижро ҳужжатларининг 245 мингдан ортиғини (24 фоизини) алимент тўловларига оид ҳужжатлар ташкил қилади. 2019 йилда бу кўрсаткич 224 мингтани ташкил қилган.

126 минг 710 га яқин алимент қарздорлари тўловларни ўз вақтида тўлаб келаётган бўлса, 58 минг 190 га яқинининг ижро ҳужжати бўйича алимент пуллари давлат ижрочилари томонидан қарздорларга мажбурий ижро этиш чораларини қўллаш орқали ундириб келинмоқда.

Мурожаатларга кўра, аксарият ҳолларда, алиментдан қарздор вилоятдаги оталар Тошкент шаҳрида ва хорижда (Росссия Федерацияда) яширинишлари аниқланган.

28

Кимларга қовун ейиш мумкин эмас?

61
Қовун - калий, магний, темир, С ва Р витаминларига бой, чанқовни қондиради, қонда холестерин даражасини пасайтиради.

ТОШКЕНТ, 6 авг — Sputnik. Қовунни совуқ сув, сут ёки спиртли ичимликлар билан аралаштириб, истеъмол қилиш мумкин эмас. Бунинг оқибатида ошқозон бузилиши ҳеч гап эмас. Бу ҳақда Роспотребнадзор РИА Новостига маълумот берди.

Қовун –  ҳазми ниҳоятда оғир бўлган маҳсулот ҳисобланади, шунинг учун уни оч қоринга ёки овқатдан кейин ейиш мумкин эмас. Қовунни овқатланиш оралиғида тановул қилиш керак, агар таркибида зарарли моддалар бўлса, улар пўчоқ яқинида бўлади, бунга эътибор бериш зарур.

Роспотребнадзор диабет, ошқозон яра касаллиги билан оғриган беморлар, шунингдек, ҳомиладор ва эмизикли аёлларга қовун ейиш ман этилади.

Қовун - калий, магний, темир, С ва Р витаминларига бой, чанқоқни босади, қонда холестерин даражасини пасайтиради ва асабни тинчлантирувчи омил сифатида қўлланилади.

61