Ўзбекистон ТИВ биноси, архив сурат

Ўзбекистон ТИВ ҳудудларда консуллик бўлимларини очади

261
(Янгиланган 11:46 23.12.2016)
Ўзбекистон Ташқи ишлар вазирлиги Самарқанд, Бухоро, Урганч ва Нукусда консуллик бўлимларини очади

ТОШКЕНТ, 23 дек — Sputnik. Хорижга чиқувчи Ўзбекистон фуқаролари ҳамда мамлакатга келувчи чет элликларга зарур консуллик-ҳуқуқий ёрдам кўрсатиш, шунингдек, Ўзбекистоннинг иқтисодий, инвестицион ва сайёҳлик салоҳиятини ривожлантириш учун қулай шароитларни яратиш мақсадида Ўзбекистон Президент Шавкат Мирзиёев 21 декабрь куни "Самарқанд, Бухоро, Урганч ва Нукус шаҳарларида Ўзбекистон Республикаси Ташқи ишлар вазирлигининг консуллик бўлимларини очиш ва Термиз шаҳридаги консуллик бўлими фаолиятини янада такомиллаштириш тўғрисида"ги қарорни имзолади. Бу ҳақда Туризмни ривожлантириш давлат қўмитаси матбуот-хизмати хабар қилган.

Мазкур қарор республика ҳудудларида ижтимоий-иқтисодий, инвестицион ва гуманитар устувор лойиҳаларни амалга оширишга ҳам хизмат қилиши лозим.

Қарорда консуллик бўлимларининг асосий вазифалари cифатида қуйидагилар кўрсатилган: консуллик-ҳуқуқий ёрдам масаласи бўйича кўрсатилаётган замонавий хизматлар турларини кенгайтириш, жойларда чет эл фуқаролари томонидан тақдим этилган ҳужжатларни кўриб чиқиш ва расмийлаштиришда, жумладан, Ўзбекистон ҳудудларига иш ва сайёҳлик мақсадларида ташриф буюрувчи хорижий давлатлар фуқароларига визалар беришда тезкорликни ошириш;

манфаатдор вазирлик ва маҳкамалар билан биргаликда хорижий мамлакатларга чиқувчи Ўзбекистон фуқароларини одам савдосига қарши кураш бўйича комплекс чоралар доирасида тушунтириш ишларини олиб бориш;

хорижий мамлакатларда паспортини йўқотган мамлакат фуқароларининг Ўзбекистонга тезкор қайтиши масаласини ҳал этишда ҳисобларни юритиш ва кўмаклашиш;

Ўзбекистон сайёҳлик салоҳиятини ривожлантириш бўйича чет эллик сайёҳларни мамлакат ҳудудларига жалб қилиш учун йўналтирилган чораларни амалга оширишда сайёҳлик компанияларига кўмаклашиш.

Хорижий давлатлар фуқароларига тезкор консуллик-ҳуқуқий ёрдамини кўрсатиш мақсадида консуллик бўлимлари Самарқанд, Бухоро, Урганч, Нукус ва Термиз халқаро аэропортлари биносига жойлаштирилади.

Эслатиб ўтамиз, жорий йилнинг декабр ойи бошида Ўзбекистон Республикасининг янги президенти Шавкат Мирзиёев Ўзбекистон Республикасининг туризм соҳасини жадал ривожлантиришни таъминлаш чора-тадбирлари тўғрисидаги Фармонни имзолади.

Фармонга мувофиқ "Ўзбектуризм" миллий компанияси тугатилиб, унинг негизида Ўзбекистон Республикаси Туризмни ривожлантириш қўмитаси ташкил этилган эди.

261
Теглар:
янги қарор, Бухоро, туристлар, консуллик, Ўзбекистон, виза, Шавкат Мирзиёев, Самарқанд
Открытие горнолыжного курорта Амирсой в Ташкентской области

"Amirsoy" тоғ-чанғи курорти янада кенгайтирилади - Ҳукумат қарори

174
(Янгиланган 10:35 19.09.2020)
Тоғ-чанғи курорти мажмуасини кенгайтиришни назарда тутувчи лойиҳанинг умумий қиймати 75 миллион еврони ташкил этиши кутилмоқда.

ТОШКЕНТ, 19 сен - Sputnik. "Amirsoy" тоғ-чанғи курортининг 2-босқичини амалга оширишга доир Ҳукумат қарори қабул қилинди, деб хабар қилмоқда Туризм давлат қўмитаси матбуот-хизмати.

"Amirsoy" тоғ-чанғи курорти мажмуасини кенгайтиришни назарда тутувчи лойиҳанинг умумий қиймати 75 миллион еврони ташкил этиши кутилмоқда.

Лойиҳа доирасида: 4 ресторан; тўрт ва беш юлдузли меҳмонхоналар, офислар ва савдо майдонаридан иборат 500 ўринга мўлжалланган кўп қаватли автотураргоҳ; осма йўллар, тоғ-чанғи кўтаргичлар, шунингдек, 16.8 км узунликдаги тоғ-чанғи трассалари; бассейнлар барпо этиш режалаштирилган.

Шунингдек, лойиҳа ташаббускорига қурилиш-монтаж ишлари ва келгусида лойиҳани эксплуатация қилиш жараёнида ноёб табиий объектлар ва мажмуаларни, ўсимликлар ва ҳайвонларнинг генетик фондини сақлаш, шунингдек, фаолиятнинг атроф муҳитга салбий таъсирининг олдини олиш ва табиатни муҳофаза қилишга оид қонун ҳужжатлари талабларига қатъий риоя қилиш бўйича масъулият юклатилди.

174
Гостиница Афросиаб Палас

Меҳмонхонага жойлашган ҳар бир киши "Е-мehmon" тизимида рўйхатга олинади - янги тартиб

57
(Янгиланган 14:29 16.09.2020)
Бундан буён меҳмонхона ва санаторийлар мижозлар келиб жойлашган вақтидан бошлаб уларни онлайн рўйхатга киритиши қатъий талаб қилинади.

ТОШКЕНТ, 16 сен - Sputnik. Бундан буён Ўзбекистон ҳудудида меҳмонхона ёки санатория хизматларидан фойдаланган барча мижозлар "Е-мehmon" тизимида рўйхатга олиниши шарт. Бу ҳақида Туризмни ривожлантириш қўмитаси хабар қилмоқда. 

Меҳмонхона, санатория, дам олиш уйлари ва шунга каби бошқа жойлаштириш воситалари хизматларидан фойдаланган барча шахслар, жумладан Ўзбекистон Республикаси фуқаролари, чет эл фуқаролари ва фуқаролиги бўлмаган шахслар ушбу муассасалар маъмурияти томонидан шахсни тасдиқловчи ҳужжатлар асосида "E-Mehmon" автоматлаштирилган ахборот тизимига киритиш орқали ҳисобга олиниши керак, - дейилган расмий хабарда.

Ҳисобга олиш аввалгидек 12 соат мобайнида эмас, балки улар келиб жойлашган вақтда, уларнинг бу ерда бўлиш муддати ва келишининг даврийлигидан қатъи назар амалга оширилади.

Жойлаштириш хизматини кўрсатувчи меҳмонхоналар, даволаш муассасалари, санаторийлар, дам олиш уйлари ва шу каби бошқа ташкилотлар раҳбарларидан мазкур тартибга қатъий риоя қилишлари сўралади.

Мазкур тартибларнинг жорий қилиниши маҳаллий ва хорижий сайёҳларнинг соғлиғи ва мулки хавфсизлигини таъминлаш,  қонуний манфаатларини ҳимоя қилиш, кафолатган хизматлар кўрсатилишини таъминлашга қаратилган. 

 

57
Терминал принял первых пассажиров, прилетевших рейсом Узбекских авиалиний из Сеула в Ташкент.

Санкт-Петербург ва Москвадан Тошкентга қўшимча чартер рейс қўйилди

3
Санкт-Петербург–Тошкент ва Москва-Тошкент йўналиши бўйича қўшимча чартер рейс қўйилди. Чипталар эркин сотувда.

ТОШКЕНТ, 20 сен — Sputnik. Санкт-Петербург –Тошкент ва Москва-Тошкент йўналиши бўйича қўшимча чартер рейс амалга оширилади. Бу ҳақда “Uzbekistan Airways” компанияси матбуот хизмати хабар қилди.

“Ўзбекистон Республикаси фуқаролари ўз Ватанларига қайтиб келишлари учун қулай шарт-шароитлар яратиш мақсадида “Uzbekistan Airways” авиакомпанияси 2020 йил сентябрь ойида Россия Федерацияси (Москва, Санкт-Петербург) шаҳарларидан Тошкентга чартер қатновларга эркин сотув очилганини маълум қилади”, - дейилган хабарда.

Қўшимча HY 3602 Москва-Тошкент рейси 23, 24, 25, 30 сентябрь, HY 3602 Санкт-Петербург-Тошкент рейси рейси 25, 28, 30 сентябрь куни амалга оширилади.

Парвозлар жадвали билан авиакомпаниянинг расмий веб-сайтида танишиш мумкин.

Маълумот учун: Парвозга фақат 72 соат олдин ПЗР таҳлили топширганлиги тўғрисида маълумотномага эга бўлган Ўзбекистон республикаси фуқаролари қўйилади. 

Эслатиб ўтамиз, Uzbekistan Airways 17 сентябрдан бошлаб Москвадан кунига 2 маротаба авиапарвозлар ташкил қилишни бошлаган эди. Айни дамда чипталар эркин савдода сотилмоқда.

3