Берлин беларус мухолифатини қўллаб-қувватлашга 21 миллионга яқин евро ажратди

368
Германия намойишларда қатнашгани учун мактаб ва университетлардан қувилганларга стипендия бериб, мустақил ОАВларни қўллаб-қувватлашни, Беларусда таъқиб остига олинаётганларга Германиядан бошпана беришни режалаштирмоқда

ТОШКЕНТ, 6 фев - Sputnik. Германия Беларус мухолифати дастурини қўллаб-қувватлаш учун 21 миллионга яқин евро ажратди, деб баёнот қилди "Беларус билан ҳамжиҳатлик" онлайн-анжуманида чиқиши вақтида ГФР ТИВ раҳбари Хайко Маас.

Германия канцлери Ангела Меркел шанба куни бўлиб ўтган анъанавий видео нутқида ГФР расмийлари Беларус мухолифатини қўллаб-қувватлаш бўйича ҳаракат режасини қабул қилганини маълум қилган эди: булар бошпана ва стипендия бериш, мустақил оммавий ахборот воситаларини қўллаб-қувватлаш билан боғлиқ.

"Шунга ишонинг-ки: Германия ва ЕИ сизнинг томонингизда. Биз Лукашенко ва унинг режимига қарши санкциялар киритдик. Ва биз 21 миллион евро сарфланиши кўзда тутилган "Беларус фуқаролик жамияти" ҳаракатлари дастурини ишлаб чиқдик", - деди вазир беларус мухолифати тарафдорларига мурожаат қилар экан.

"Биз намойишларда қатнашгани учун мактаб ва университетларда ўқувчи-талабалар сафидан чиқарилганларга стипендия таклиф этамиз. Мустақил ОАВларни қўллаб-қувватлаймиз. Қийноқлар қурбонларига психологик ёрдам кўрсатамиз ва Беларусда таъқиб остига олинаётганларга Германиядан бошпана берамиз. Ва биз инсон ҳуқуқларини бузаётганларга қарши далилларни тўплаш бўйича механизмни яратамиз. Кун келади ва улар жавобгарликка тортилади. Кун келади, Беларус халқи демократия, эркинлик ва қонун устуворлиги шароитида яшай олади", - деган Маас.

Беларусда бўлиб ўтган 9 августдаги президент сайловларида олтинчи маротаба 80,1 % овоз билан Александр Лукашенко ғалаба қозонгач, мамлакатда мухолифатнинг оммавий норозилик акциялари бошланиб кетган эди, улар куч тузилмалари томонидан махсус воситалар ва махсус техника ёрдамида бостирилганди. Ҳуқуқ-тартибор органлари Беларусдаги норозиликларнинг радикаллашуви ҳақида баёнот берди. Оппозиция фикрича, сайловларда Светлана Тихановская ғолиб чиққан.

Европа иттифоқи, Буюк Британия, АҚШ ва Канада сайловлардан кейин амалдаги ҳукумат тарафдори бўлган беларуснинг қатор расмий шахслари ва корхоналарига нисбатан санкциялар киритишди. Минск санкцияларга санкциялар билан жавоб қайтарилишини маълум қилди.

Беларус ҳукумати мамлакатдаги норозилик акциялари чет элдан туриб мувофиқлаштирилаётгани ҳақида кўплаб маротаба айтган эди. Лукашенко Ғарбни республикадаги вазиятга тўғридан-тўғри аралашганликда айблади ва тартибсизликлар АҚШ томонидан йўналтирилаётгани, европаликлар эса Америка чалаётган куйга рақс тушаётганини қайд этди. Лукашенко протест акциялари Польша, Чехия, Литва ва Украинадан туриб мувофиқлаштирилаётганини қўшимча қилган.

368

Бутина америка турмаларидаги қийноқлар ҳақида гапирди

586
(Янгиланган 18:07 27.02.2021)
Бутинанинг айтишича, уни карцерга ўтказиб, у ерда тўрт ой давомида ушлаб туришган, гарчи халқаро стандартлар бўйича карцерда 15 кундан ортиқ ушлаш мумкин бўлмаган.

ТОШКЕНТ, 27 фев — Sputnik. Америка қамоқхонасидан озод қилинган россиялик, жамоатчилик палатаси аъзоси Мария Бутина "НТВ" учун суратга олинган фильмда америка турмасида бошидан кечирганлари ҳақида сўзлади.

"Рўй берган воқеаларни холокостга қиёслаш мумкин, ахир бу миллатингиз туфайли таъқиб эди-да. Ҳозир эса россиялик ватандошларимизни ҳам худди шундай миллати ва фуқаролиги учун таъқиб қилишмоқда", - деди у.

Бутинанинг айтишича, уни карцерга ўтказиб, у ерда тўрт ой давомида ушлаб туришган, гарчи халқаро стандартлар бўйича карцерда 15 кундан ортиқ ушлаш мумкин бўлмаган.

"Тунда ҳар 15 дақиқада светни ёқишиб: "Are you окay?" (Яхшимисан?) деб сўрашади. То уларга жавоб бермагунингга қадар сени уйғотаверишади", - деди Бутина.

Бундан ташқари, Бутинани аллақандай препаратлар қабул қилишга мажбур этмоқчи бўлишган.

"Улар одамни урмайди, шунчаки руҳан қийнашади, психотроп препаратлар ичишга мажбур этишади, чунки улар таъсирида тергов қилиш осонроқ", - дейди Мария.

Бутинанинг айтишича, кунига беш маҳалдан назоратчилар унинг камерасига келиб, контрабанда борлиги гумони остида уни яланғоч қилиб ечинтиришган.

Россияликнинг сўзларига кўра, камерада деярли ҳеч қачон свет ўчирилмаган. Боз устига, назоратчилар ҳамиша баланд чийилдоқ овоз чиқишини таъминлаб берганлар.

"Яъни улар ҳамиша шу чийилдоқ овоз билан ҳам мўртлашиб қолган руҳиятингизга таъсир ўтказишади. Иродангизни тамомила синдиришади", - деб хотима қилди Бутина.

Бутина 2018 йилнинг июлида қўлга олинган ва "ноқонуний чет эл агенти бўлиш мақсадида тил бириктирув" айблови билан 18 ойга қамалган. 2019 йилнинг октябрида Бутина озодликка чиқарилган ва Россияга депорт қилинган эди.

586
Портрет саудовского журналиста Джамаля Хашукджи в Стамбуле

Саудиялик журналист Хашоггининг Истанбулда ўлдирилиши - АҚШ меросхўр шаҳзодани айблади

198
Разведка маълумотига кўра, мамлакатда қарор қабул қилиш устидан назорат даражаси шу қадар юқорики, бу сингари ишлар шаҳзоданинг "оқ фотиҳаси"сиз рўй бериши мумкин эмас.

ТОШКЕНТ, 27 фев — Sputnik. Журналист Жамол Хашоггининг Истанбулда қўлга олиниши ёки ўлдирилиши бўйича операция 2018 йилда Саудия Арабистони меросхўр шаҳзодаси Муҳаммад бин Салмон томонидан шахсан маъқулланган. Бу ҳақда АҚШ Миллий разведкаси директори офиси докладида айтилган. РИА Новости хабари асосида.

Разведка маълумотига кўра, мамлакатда қарор қабул қилиш устидан назорат даражаси шу қадар юқорики, бу сингари ишлар шаҳзоданинг "оқ фотиҳаси"сиз рўй бериши мумкин эмас.

"Меросхўр шаҳзода Хашоггини қироллик учун таҳдид деб билган ва зарурат туғилганида, унинг оғзини ёпиш учун зўравонлик чоралари қўлланилишини кенг қўллаб-қувватлаган", - дейилади доклад матнида.

Унда айтилишича, саудиялик амалдорлар операцияга олдиндан тайёргарлик кўришган, АҚШ "Хашогги қотиллигида "катта эҳтимол билан" қўли бор деб гумонлаётган" 21 кишидан иборат рўйхат ҳам келтирилган. Шу билан бирга, разведка ушбу алоқадор шахслар операция финали қандай бўлишини олдиндан билишган, деган фикрни таъкидлай олмайди.

Разведканинг ушбу доклади эълон қилинганидан сўнг, АҚШ давлат котиби Энтони Блинкен "Хашогги таъқиқи" киритилиши ҳақида эълон қилди.

"Бу чет эл ҳукуматлари вакили бўла туриб, диссидентларга, жумладан, ўз иши туфайли диссидентлар ҳисобланувчи журналистлар, фаоллар ёки бошқа шахсларни бостириш, таъқиб қилиш, кузатиш, қўрқитиш ёки бошқа зиён етказиш сингари жиддий экстериториал ҳаракатларда қатнашган шахсларга виза чекловларини киритиш имконини беради", - дейди амалдор.

Доклад эълон қилинганидан сўнг ўлдирилган журналистнинг рафиқаси Хатижа Женгиз Twitter да #justiceforjamal ("Жамол учун адолат") хэштегини жойлаштирди.

БМТнинг суддан ташқари қатллар бўйича махсус маърузачиси Аньес Калламар АҚШни Саудия Арабистони валиаҳд шаҳзодаси Муҳаммад бин Салмонга қарши санкцияларни қўллашга чақирди.

"Қўшма Штатлар ҳукумати валиаҳд шаҳзодага, бошқа жиноятчиларга бўлгани каби, унинг шахсий активларига, шунингдек халқаро мажбуриятларига нисбатан ҳам санкцияларни қўллаши керак", - дейилади баёнотда.

Ўз навбатида, Саудия Арабистони ҳукумати АҚШ разведкасининг меросхўр шаҳзода Хашогги қотиллигига алоқадорлиги тўғрисидаги доклади хулосаларини рад этди.

"Саудия Арабистони Қироллиги ҳукумати ҳисоботда келтирилган Қироллик раҳбариятига берилган негатив, ёлғон ва мақбул бўлмаган баҳосини бутунлай рад этади ва ҳисоботда ноаниқ маълумотлар ва хулосалар бўлганлигини таъкидлайди", - дейилади ТИВ баёнотида.

Яқин шарқ қироллиги Ташқи ишлар вазирлиги шунингдек, АҚШ ва қироллик ўртасида "мустаҳкам шериклик" мавжудлигини қайд этиб ўтган.

Консулликда юз берган қотиллик

Таниқли саудиялик журналист Жамол Хашогги 2017 йилдан АҚШда истиқомат қилган ва Washington Post газетасида фаолият юритган. У 2018-йилнинг октябрида Истанбулда ўлдирилган эди. Аввалига саудия ҳукумати унинг Саудия Арабистони Қироллиги консуллиги ҳудудида ғойиб бўлганини тўлиқ рад этган, аммо видео- ва аудио ёзувларнинг пайдо бўлганидан сўнг Хашогги "консуллик ходимлари билан юз берган можаро оқибатида ўлдирилганлигини" тан олишди.

Туркия полицияси журналист жасадини топа олмади.

Араб матбуоти, Саудия Арабистони ҳукумати ҳаракатларини танқид қилган Хашоггини ўлдириш буйруғи қиролликдаги тахт учун даъвогар - валиаҳд шаҳзода томонидан берилган бўлиши мумкинлиги ҳақидаги версияларни илгари сурган эди. Бироқ, Қироллик Ташқи ишлар вазирлиги валиаҳд шаҳзоданинг бу жиноятга мутлақо алоқаси йўқлигини таъкидлаб келган.

 

198